– Vi ønsker at rettleiaren blir tatt aktivt i bruk. Det er først då vi kan lukkast med å forenkle for frivillige organisasjonar, seier Marianne Alværen Torset i Lotteri- og stiftelsestilsynet.
Kultur- og likestillingsdepartementet sin rettleiar Forenkling av statlege tilskotsordningar for frivillige organisasjonar er revidert og lagt ut i nettversjon på tilskudd.no. Lotteri- og stiftelsestilsynet har bidratt i arbeidet.
Våren 2025 har rettleiaren vore på departementsførelegging og innspelsrunde til utvalde tilskotsforvaltarar og frivillige organisasjonar.
– Det kom inn fleire nyttige innspel som vi har tatt inn i rettleiaren.
Målet med rettleiaren er at det skal bli enklare for frivilligheita å søke om og rapportere på statlege tilskot, slik at ressursar kan bli frigjorde til aktivitet. Målgruppa for å få dette til er alle som forvaltar tilskot til frivillig sektor.
Skal hjelpe tilskotsforvaltarar til å forenkle for frivilligheita
Rettleiaren gir råd om forenkling til tilskotsforvaltarar, særleg når det gjeld type tilskot, gjenbruk av data, revisjon og revisorrapport, og dessutan overføring av midlar.
– Rettleiaren er eit viktig verkemiddel for å få på plass felles føringar for statlege tilskotsordningar retta mot frivillig sektor.
Den kan slik vere til hjelp når eit departement skal utarbeide eller revidere regelverk for tilskotsordningar.
– Forvaltarane bør vurdere om eksisterande ordningar kan forenklast, eller om omgrep kan harmoniserast, i tråd med denne rettleiaren.
Dette er tredje utgåve av rettleiaren og denne gong er den på nynorsk. Rettleiaren er lansert i digital utgåve på tilskudd.no i dag.
Les rettleiaren – Forenkling av statlege tilskotsordningar for frivillige organisasjonar.