På årets Speleansvarskonferanse får du møte menneske som har hatt speleproblem eller vore pårørande, og kva dei har gjort for å hjelpe andre. Vi har særleg fokus på fotballspelarar, og korleis ein skal unngå at mange av dei får problem med gambling.
Konferansen er 16. oktober på The Hub i Oslo. Påmeldingsfristen er 1. september.
Nokre av dei du får møte på konferansen
- Den britiske keeperlegenda Peter Shilton og kona Steph Shilton
- Tidlegare fotballspelar Freddy dos Santos
- Kultur- og likestillingsminister Lubna Jaffery
- Per Einar Karlsen i Norsk Tipping
- Fredrik Thorbjørnsen Lillejordet, som har utvikla appen Spillefri
- Lill- Tove Bergmo i Spillavhengighet Norge.
Programmet er under utarbeiding, så det kan dukke opp fleire gjestar på scena. Detaljert program kjem seinare.
Engelsk fotballhelt
Den britiske keeperlegenda Peter Shilton er den landslagsspelaren for England som har flest kampar spelt i engelsk ligasystem. Mest kjent er han nok for å ha stått i mål då Diego Maradona skåra mål med handa i VM i 1986.
Mindre kjent for oss nordmenn er nok den dystre baksida av heltestatusen. Shilton har hatt speleproblem i 45 år. Kona Steph, som han gifta seg med for 10 år sidan, oppdaga problemet. Ho tvinga han til å ta tak i det, og han har no vore spelefri i 8 år.
Dei to har oppsøkt offentlegheita etter at Peter oppdaga at det skjer eitt sjølvmord kvar dag i England, som følge av speleproblem. Med arbeidet for å førebygge speleproblem har dei markert seg så sterkt at regjeringa har fatta interesse for jobben dei gjer. Du møter dei begge på Speleansvarskonferansen.
Inn i fotballgarderoben
I gjeldande handlingsplan mot speleproblem er fotballspelarar ei gruppe som blir via ekstra merksemd. I regi av Norsk Toppfotball og Norsk Tipping reiser Freddy dos Santos (tidlegare Norsk Toppfotball) og Per Einar Karlsen (Norsk Tipping) rundt til norske fotballklubbar for å sette fokus på speleproblem blant fotballspelarar. Korleis reaksjonane har vore skal dei to fortelje meir om på konferansen.
Utvikla app etter å ha opplevd speleproblem i familien
Mange som har opplevd speleproblem tett på dagleglivet har brukt erfaringane sine til å hjelpe andre.
Fredrik Thorbjørnsen Lillejordet brukte teknologikompetansen sin til å utvikle appen Spillefri, etter å ha opplevd speleproblem i familien.
Lill-Tove Bergmo oppretta det som no er landet største frivillige organisasjon for personar med speleproblem og pårørande, etter at mannen hadde speleproblem.
Har du spørsmål til konferansen kan du ta kontakt med Tone Lin Støfring Skovro på e-post tone.lin.skovro@lottstift.no eller mobil 911 08 181.