Kringkastarar som arrangerer bingo i lokalradio eller lokalfjernsyn må halde seg til følgande reglar for premiar.
Lodd kan ikkje vere premie
Det er ikkje tillatt å bruke lodd, som for eksempel Flax-lodd og bingobongar, som premiar i pengespel.
Det har Kultur- og likestillingsdepartementet slått fast. Dette fordi premiar i form av lodd ikkje utgjer ein reell premie, men berre ein moglegheit til å oppnå ein premie i eit anna pengespel.
Unntaket er om du brukar gåvekort til bingobong og har fleire premieval. Sjå nederst på denne sida.
Pengespel og gratisspel kan ikkje vere gevinst
I pengespelforskrifta (kapittel 3) er det sett opp fleire tiltak for å forebygge speleproblem og sikre ansvarlege spel. Det er blant anna forbod mot enkelte verkemiddel for å fremme deltaking i pengespel.
Det er forbode å nytte VIP-program, bonus- eller gratisspel eller liknande personlege økonomiske insentiv for å fremme deltaking i pengespel, jf. pengespelforskrifta § 11. Slike verkemiddel har som hensikt å fremme og auke deltakinga i pengespel (marknadsføring av spela), og kan gi auka risiko for speleproblem.
Forbodet mot slike verkemiddel er innført for å beskytte spelarane og gjeld alle som tilbyr pengespel. Dette gjeld også kringkastarar som tilbyr bingospel i lokalradio og lokalfjernsyn.
Kva konsekvensar får dette for kringkastarane?
- Det er forbode å gjennomføre konkurransar i bingosendingane der premien er gratis spel. Dette er uavhengig av om premien er gratis spel (bingobongar) i eige bingospel, eller pengespel frå ein anna pengespeltilbydar (for eksempel Flax-lodd).
- Kringkastaren kan heller ikkje ha konkurransar i andre program der eigne bingospel er premie. Dette vil bli rekna som eit verkemiddel for å marknadsføre bingospelet og vil derfor vere i strid med § 11 i pengespelforskrifta.
- Bestemminga hindrar likevel ikkje at andre program hos kringkastaren tilbyr konkurransar der pengespel frå andre pengespilltilbydarar er premie (for eksempel Flax-lodd). Slike konkurransar har ikkje same knyting inn i bingospelet. Kringkastar har likevel eit ansvar for at aldersgrensa på slike lodd blir halden. Det er forbode å marknadsføre slike premiar mot mindreårige.
Lotteritilsynet gjer oppmerksam på at ein del konkurransar kan komme inn under regelverket for pengespel.
Kan du bruke gåvekort til ny bingobong?
Det har kome spørsmål om gåvekort frå kringkastarar. Dei har gåvekort som er knytt til varer i kringkastar sitt sortiment og som dei brukar som premie i bingo.
Spørsmålet var om vinnar også kan bruke gåvekortet til ny bingobong?
Lotteritilsynet har vurdert det slik at så lenge vinnar har eit reelt val om kva premie dei kan bruke gåvekortet til, så er det uproblematisk å bruke ny bingobong som eitt av vala. Men det må vere fleire reelle valmoglegheiter for vinnar.