Fleire store, folkekjære konkurransar nærmar seg. – Typiske moglegheiter ulovlege spelselskap brukar for å komme på i media, seier Hedvig Inderhaug i Lotteritilsynet.
Det nærmar seg Eurovision Song Contest og fleire store idrettsarrangement. Lotteritilsynet vil informere norske mediehus om at ulovlege spelselskap kan gjer fleire forsøk på å få omtale i samband med store arrangement.
Les informasjonsbrevet som er sendt til norske mediehus.
Tidlegare har vi til dømes sett at ulovlege spelselskap sender pressemeldingar om odds på populære arrangement, som igjen blir omtala i redaksjonelle medium.
– Dette er merkevarebygging for dei ulovlege aktørane. Inntrykket vårt er at mange redaksjonar er obs på dette, men at det likevel kan vere behov for informasjon. Tidlegare har vi til dømes sett at selskapa blir omtala, utan at lesaren blir informert om at dei er ulovlege selskap, seier Hedvig Inderhaug, jurist i Lotteritilsynet.
Vi har også sett døme på at redaksjonelle medium lenkar til underleverandørar som promoterer pengespeltilbod.
– Det bidrar til å gjere ulovlege spel meir tilgjengelege for folk flest.
Fleire tips om annonsar
Programmatiske annonsar er automatisert kjøp av nettannonsar, og brukt av mange mediehus. Programmatisk annonsering krev at mediehusa har filter som lukar ut ulovleg reklame.
Den siste tida har vi fått fleire tips om at norske mediehus har annonsar for ulovlege pengespel.
– Slike annonsar er brot på pengespellova, og kan føre til sanksjonar for redaksjonane. Vi har god dialog med mediehusa om dette. Vi oppmodar dei til å vere ekstra oppmerksomme på forsøke på å omgå annonsefilter, samt å undersøke om filtera i tilstrekkeleg grad oppdagar ulovleg reklame, seier Inderhaug.