Det tidlegare varsla lovbrotsgebyret for brot på kvitvaskingsreglane er no vedtatt.
Pengespel kan brukast til kvitvasking og økonomisk kriminalitet. Derfor skal Norsk Rikstoto har system som kan avdekke kvitvasking.
Då Lotteritilsynet hadde tilsyn antikvitvaskingsarbeidet til Norsk Rikstoto tidlegare i haust, fann vi 6 lovbrot. Vi har ikkje tilsyn med om det har skjedd kvitvasking, men med systema Norsk Rikstoto har.
I november sendte vi varsel om inntil 2 millionar i lovbrotsgebyr, samt 50 000 kroner dagen i tvangsmulkt. No er det vedtatt at Norsk Rikstoto må betale 2 millionar i lovbrotsgebyr. Når det gjeld tvangsmulkt har dei fått frist til å rette opp avvika. Dersom dei ikkje er retta innan fastsette fristar, blir det gjort vedtak.
– Dei har bevisst sett til side absolutte lovkrav som skal gjere dei i stand til å avdekke og hindre kvitvasking. Når dei ikkje har gode nok system aukar risikoen for at dei skal bli utnytta til kvitvasking av pengar, seier Tatyana Søreide Klepaker, jurist i Lotteritilsynet.
Norsk Rikstoto kan klage på vedtaket innan 15. januar 2026
Lovbrota er knytt til:
Manglande risikobaserte kundetiltak
Norsk Rikstoto skal vite nok om dei som blir kundar til å vurdere risiko og etablere riktige tiltak, men dei har bevisst valt å ikkje gjere det når det blir inngått nye kundeforhold. Når dei ikkje har dette på plass påverkar det sannsynet for å reagere med riktige tiltak på riktig tidspunkt. Dei har heller ikkje periodisk oppfølging av kundeforholda.
Handtering av kundar som er politisk eksponerte personar (PEP)
Politisk eksponerte personar (PEP) er ekstra utsette for korrupsjon, og skal ha eigne kundetiltak. Berre 15 av 390 slike kundar har det. Sjølv om dette er eit absolutt lovkrav har Norsk Rikstoto innført sin eigen praksis.
Risikovurderinga er ikkje god nok
Norsk Rikstoto skal identifisere risikoar for kvitvasking og terrorfinansiering og korleis spela deira kan brukast til det.
Tapte kundedata
Norsk Rikstoto har tapt delar av kundedata dei har plikt til å lagre i fem år. Dette lovbrotet gir ikkje tvangsmulkt, men lovbrotsgebyr.