Skal halde fram med å tilby pengespel for store organisasjonar.
Godkjende organisasjonar med internasjonal aktivitet kan søke om å tilby og få inntekter frå store pengespel. Då kan dei omsette for maks 410 millionar kroner årleg (med ei årleg justering etter konsumprisindeks).
I 2026 går dei eksisterande løyva ut, og derfor har det vore ny søknadsrunde.
Løyva gjeld til 2035
- Norges Røde Kors har fått nytt løyve til konseptet Pantelotteriet, med Norsk Pantelotteri AS som medhjelpar. Det vil seie at Norsk Pantelotteri AS gjennomfører lotteriet, men minst 50 prosent av omsetninga (etter at gevinstane er trekt frå), skal gå til Norges Røde Kors.
- 23 organisasjonar har fått løyve til konseptet Postkodelotteriet, med Norsk Postkodelotteri AS som medhjelpar. Blant dei 23 organisasjonane er SOS Barnebyer, WWF, Redd Barna, Kirkens Nødhjelp og Norsk Folkehjelp. Det vil seie at Norsk Postkodelotteri AS gjennomfører lotteriet, mens 50 prosent av omsetninga (etter at gevinstane er trekt frå) skal gå til dei 23 organisasjonane.
Løyva gjeld frå 1. mars 2026 til 28. februar 2035.
– Det er nytt i år at Postkodelotteriet søker om å tilby pengespel for 23 organisasjonar. Tidlegare har det vore to, seier Tore Bell, avdelingsdirektør i Lotteritilsynet.
Det var berre Postkodelotteriet og Pantelotteriet og organisasjonane dei er tilknytta som søkte om løyve for denne perioden. Til saman er det dermed gitt to løyve fordelt på 23 og ein organisasjon.
Sjå løyvet til Postkodelotteriet (PDF).
Sjå liste over organisasjonar under konseptet Postkodelotteriet (PDF).