Skal de arrangere eller motta overskot frå lotteri, bingo eller andre pengespel? De må søke om godkjenning frå oss dersom samla bruttoomsetning er over 200 000 per kalenderår.
Denne godkjenninga må de ha på plass i løpet av dette året dersom de skal arrangere eller motta inntekter frå pengespel frå og med 2025. Vi har for tida stor arbeidsmengde, og dette fører til at saksbehandlingstida er lengre enn vanleg. Saksbehandlingstida for søknadar om førehandsgodkjenning er for tida 4-6 veker.
Dersom den samla omsetninga er under 200 000 kroner brutto per kalenderår, treng de ikkje godkjenning eller løyve frå oss. Grensa gjeld samla for alle pengespel (f.eks basar, lotteri og bingo), overskotet må gå til eit ikkje- fortenestebasert formål, pengespelet må ha lokalt eller regionalt omfang og det er ikkje lov å bruke medhjelpar.
Ikkje-fortenestebaserte formål
Omgrepet «ikkje-fortenestebasert» betyr at aktiviteten ikkje skal ha overskot som formål, og at formålet ikkje skal generere forteneste til dei som driv aktiviteten. Overskotet skal i sin heilskap gå til den frivillige aktiviteten.
Grasrotandelen til Norsk Tipping er ikkje rekna som ein del av samla omsetning, fordi det ikkje er eit pengespel organisasjonen arrangerer sjølv.
Her kan de sjå kva organisasjonar som er godkjente etter ny pengespellov frå 1. januar 2023.
Dette risikerer de om de ikkje søker
Dersom de ikkje har godkjenning kan de ikkje arrangere pengespel med samla omsetning over 200 000 bruttokroner per kalenderår.
Hugs at de også må søke om løyve til å arrangere sjølve pengespela, dersom omsetninga er over 200 000 bruttokroner per kalenderår.
Kva organisasjonar og kringkastarar kan få godkjenning?
Organisasjonar:
- Må vere registrerte i Frivilligregisteret.
- Må ha frivillig innsats som ein viktig del av verksemda.
- Kan ikkje vere tilgjengeleg berre for ein lukka krets.
- Kan ikkje drive aktivitet som gir privatøkonomiske fordelar.
- Dersom de søker som hobby- eller fritidsorganisasjon, må ein vesentleg del av aktiviteten vere retta mot barn og unge under 18 år.
De kan ikkje bli godkjende dersom verksemda er organisert av eller på vegne av det offentlege, og stat, kommune eller fylkeskommune kan påverke eller legge føringar på verksemda. Eit døme er dersom stat, fylkeskommune eller kommune oppnemner styremedlemmar.
Kringkastarar:
- Må ha konsesjon etter kringkastingslova til å tilby lokalradio/lokalfjernsyn.
- Konsesjonen må vere tatt i bruk på søknadstidspunktet, og ha hatt aktivitet dei siste seks månadane.
Gebyr for godkjenning er 2 000 kroner per organisasjon.
Førehandsgodkjende organisasjonar og kringkastarar skal rapportere rekneskapsopplysningar årleg
Innan 1. juni kvart år skal de sende rekneskapsopplysningar til Lotteritilsynet. De må rapportere om endringar som kan påverke godkjenninga, eller andre krav som sikrar at godkjenninga er på rett grunnlag.
Dersom endringane gjer at de ikkje lenger oppfyller vilkåra, kan vi kalle tilbake godkjenninga og løyvet. Det kan vi også gjere dersom de ikkje sender inn rekneskapsopplysningar.
De kan lese meir om regelverket i pengespellova og pengespelforskrifta.
Fann du ikkje svar på det du lurer på? Kontakt oss her.